Autoritetet greke po hetojnë rrethanat në të cilat humbi jetën një 18-vjeçare në ujëvarat e Dermatës. Të dhënat paraprake lënë të kuptohet se ngjarja mund të ketë qenë një aksident. E reja, e cila do të festonte ditëlindjen e saj të 18-të, kishte shkuar në zonë së bashku me të dashurin e saj 17-vjeçar. Sipas informacioneve, të dy futeshin dhe dilnin nga uji në liqenin e formuar poshtë ujëvarës, i cili në atë pjesë nuk ka thellësi të madhe. Në një moment, 18-vjeçarja dyshohet se i dha telefonin e saj të dashurit, në mënyrë që ai ta fotografonte. Sipas dëshmisë së 17-vjeçarit, ajo u pengua dhe u zhyt në ujë. Fillimisht, i riu mendoi se ajo po bënte shaka, por kur kuptoi se situata ishte serioze, tentoi ta nxirrte nga uji, pa mundur ta shpëtonte. Në vendngjarje u mobilizuan forcat e kërkim shpëtimit, por pa rezultat. Pas kërkimeve, 18-vjeçarja u gjet në ujë pa shenja jete.