Në kuadër të mbarëvajtjes së trafikut në kryeqytet Policia RRugore e Tiranës ka vijuar aksionin me ‘dorë të hekurt’ ndaj parkimeve apo ndalimeve të përkohshme në rrugë. Policia në njoftimin e saj shprehet se po vijon kontrolli i territorit sipas rendit të vendosur në planin e veprimit, për ndëshkimin e mjeteve dhe drejtueseve të tyre, të cilët vazhdojnë të jenë të padisiplinuar në raport me detyrimet ligjore për mënyrën e qëndrimit dhe pushimit të mjeteve sipas normave të përcaktuara në Kodin Rrugor. ‘Rrugorët’ e kryeqytetit kanë ushtruar kontrolle në Rrugën e Dibrës dhe bulevardin “Zogu i Parë”, ku janë verifikuar dhe konstatuar të pushuara në shkelje të rregullave të qarkullimit rrugor, 98 automjete të ndryshme, të cilat janë ndëshkuar sipas dispozitave të parashikuara në Kodin Rrugor. Policia u bën thirrje qytetarëve që të respektojnë rregullat e qarkullimit rrugor pasi nuk do të tolerojë asnjë shkelje.