Një 55 vjeçar, banues në Fier, i shpallur në kërkim ndërkombëtar, është kapur dhe arrestuar nën akuzën se rekrutonte dhe dërgontë ilegalisht në Itali, gra shqiptare, të cilat shfrytëzoheshin për prostitucion. Nga Seksioni për Hetimin e Narkotikëve dhe Trafiqeve të Paligjshme në Drejtorinë Vendore të Policisë, Fier, në bashkëpunim me Interpol Tirana, në vijim të punës për kapjen e personave të shpallur në kërkim ndërkombëtar, bazuar dhe në informacionet e mara në rrugë policore, u bë i mundur lokalizimi, kapja dhe arrestimi i përkohshëm, me qëllim ekstradimin drejt Italisë, i shtetasit Saimir Mehmeti. Arrestimi i këtij shtetasi u bë pasi autoritetet gjyqësore në Genova, të Italisë, e kanë dënuar me 7 vite e 6 muaj burg, për veprat penale "Grup kriminal", "Shfrytëzim prostitucioni" dhe "Plagosje". Interpol Tirana, në bashkëpunim me Interpol Romën, vijon procedurat për ekstradimin e këtij shtetasi drejt Italisë.