Policia e Shtetit në bashkëpunim me autoritetet italiane kanë zhvilluar një operacion ndërkombëtar, ku është goditur një grup i strukturuar kriminal që merrej me trafikimin e lëndëve narkotike. Në kuadër të këtij operacioni kanë rënë në pranga tre shqiptarë, të cilët akuzohen se kanë qenë pjesë e grupit kriminal në Itali që trafikonte kanabis. Nga hetimet ka rezultuar se pjesë e këtij grupi ka qenë dhe një person tjetër, i cili aktualisht po vuan dënimin në burgun e Rrogozhinës. Shqiptarët akuzohen se në vitin 2019, kanë trafikuar në Itali, kryesisht në Romë, lëndë narkotike kanabis sativa. Policia e Shtetit njofton se po vijon punën për goditjen e krimit dhe trafikimit të drogës si dhe kapjen e shtetasve të shpallur në kërkim. Operacioni u realizua si rezultat i bashkëpunimit të autoriteteve shqiptare me me homologët italianë, me Zyrën e Interforcës Italiane në Shqipëri, Karabinierinë e Romës dhe me Drejtorinë e Interpolit.