Një tjetër zyrtar i Bashkisë Himarë është arrestuar nga policia, në kuadër të operacionit për tjetërsimin e pronave në Dhërmi. Burimet policore bëjnë me dije se në pranga është vënë shtetasi Elton Marko, me detyre topograf pranë Bashkisë Himarë, si I dyshuar për falsifikimin e formularëve të aktit të marrjes së tokës në pronësi, të cilin e ka përdorur për regjistrimin e një pasurie në fshatin Dhërmi dhe më pas e ka shitur tek persona të tjerë. Elton Marko ishte me detyrë inxhinier. Më 23 prill 2021, ka regjistruar në Kadastren e Vlorës pasuritë hipotekore 307-308-309, nën pronësinë e familjarëve të tij, Arqile Marko, Mimoza Marko, Elton Marko dhe Larisa Marko, për pasurinë e llojit “ullishte” dhe “arrë”. Elton Marko akuzohet pëer kryerjen e veprave penale “Falsifikim i dokumenteve”’ dhe “Pastrim të produkteve të veprës penale ose veprimtarisë kriminale’. Më herët, nën dyshimin e falsifikimit të dokumenteve dhe tjetërsimit të pronave janë arrestuar Drejtori i administrimit e mbrojtjes së tokës në Vlorë, Bardhyl Gjika, specialisti i kësaj drejtorie, Kreshnik Mino dhe ish-kreu i kadastrës së Vlorës Klodjan Troci.