Prokurorja e Shkodrës Elsa Gjeli e denoncuar nga kryeministri Edi Rama, i është drejtuar me një shkresë qeverisë se prokurorëve duke i shprehur shqetësim mbi situatën dhe kërkon reagim nga ky institucion. Ankesa e prokurores do të shqyrtohet në mbledhjen e kësaj të premteje të Këshillit të lartë të Prokurorisë. Një ditë më parë ministri i Drejtësise Ulsi Manja iu drejtua me një shkrese ILD për nisjen e ecurisë disiplinore ku për dijeni shkresa u transmetua edhe KLP. Në shkresën drejtuar Inspektorit të Lartë të Drejtësisë, Artur Metani, Manja thotë se ‘prokurorja Gjeli vendosi mosfillimin e procedimit penal brenda 48 orëve nga regjistrimi i kallëzimit penal’. Pak ditë më parë, kryeministri Edi Rama akuzoi prokuroren Elsa Gjeli se ‘ka hedhur në kosh’ denoncimin e bërë për ndërtimin e një fshati pa leje në Theth. Ai shtoi se Ministria e Drejtësisë po përgatit denoncimin e çështjes në Këshillin e Lartë të Prokurorisë. Më herët reagoi edhe prokuroria e rrethit Shkodër ku shprehu shqetësim mbi deklaratat e bëra, ndërsa tha se prokuroria Gjeli ka vepruar në bazë të referimit të policisë vendore.