I shpallur si grup terrorist nga Shtetet e Bashkuara të Amerikës, Hayat Tahrir al-Sham, apo HTS, arriti të rrëzojë nga pushtetit Bashar al Asad-in dhe të marrë kontrollin e vendit. Por edhe pse I shpallur si grup terrorist, Shtetet e Bashkuara pranojnë se kanë komunikuar me këtë grup. Ka qenë Sekretari Amerikan i Shtetit, Antony Blinken, që ka bërë deklaratën në fjalë, duke u bërë zyrtari i parë amerikan që konfirmon publikisht kontaktet midis administratës së Presidentit Biden dhe grupit Hayat Tahrir al-Sham, ose HTS, e cila udhëhoqi një koalicion grupesh të armatosura opozitare që rrëzuan Assadin nga pushteti të dielën e kaluar. Deklarata është bërë në një konferencë shtypi në Aqaba të Jordanisë, ku tha se nuk do të diskutonte detajet e komunikimeve, por se ishte e rëndësishme që Shtetet e Bashkuara t'i përcillnin mesazhe grupit në lidhje me qëndrimet e tij dhe planet e qeverisjes në një periudhë tranzicioni. "Po, ne kemi qenë në kontakt me HTS-në dhe palët e tjera," tha zoti Blinken. Ai shtoi se "mesazhi ynë për popullin sirian është ky: Ne duam që ata të kenë sukses dhe jemi të përgatitur t'i ndihmojmë ta bëjnë një gjë të tillë". Në një intervistë të shtunën në televizionin sirian, udhëheqësi i grupit, Ahmad al-Sharaa, i njohur më parë si Abu Mohammed al-Golani, nuk foli për kontaktet e drejtpërdrejta me Shtetet e Bashkuara, por tha se autoritetet e reja në kryeqytetin Damask janë në kontakt me ambasadat perëndimore. Ky grup I drejtuar nga Al-Sharaa ka deklaruar se do të mbrojë të drejtave të pakicave dhe grave, por pavarësisht kësaj SHBA-të mbeten skeptikë se ai do t'i respektojë ato në planin afatgjatë. Të premten, rebelët dhe opozita e Sirisë bashkëpunuan për t'i dorëzuar në mënyrë të sigurtë zyrtarëve amerikanë një amerikan që ishte burgosur nga Asadi.