Deputetët rusë i kanë kërkuar Vladimir Putinit të njohë dy zonat e kontrolluara nga separatistët në ukrainën lindore, si të pavarura. Kjo vjen pas një votimi në dumën ruse, të martën. Dy rezoluta u paraqitën në dhomën e ulët me qëllim njohjen e republikës së vetëshpallur të Donetskut dhe republikës së vetëshpallur të Luhanskut. Të dyja këto rajone ndodhen në rajonin lindor të Ukrainës, Donbash, ku separatistët e mbështetur nga rusia kanë luftuar kundër forcave ukrainase që nga viti 2014. Dallimi mes dy rezolutave është se e para i drejtohej direkt Putinit që të njihte ‘urgjentisht’ dy zonat si të pavarura ndërsa e dyta iu dërgua ministrisë së jashtme ruse dhe strukturave të tjera qeveritare për studim dhe vlerësim. Viacheslav Volodin, kryetar i dhomës së ulët të deputetëve, Dumës, tha në një deklaratë pas votimit se deputetët vendosën që t’ia drejtonin apelin direkt presidentit. Ai argumentoi se një njohje e tillë do të krijonte terrenin për garantimin e sigurisë dhe mbrojtjes së banorëve të këtyre republikave nga kërcënime të jashtme si edhe do të forconte paqen ndërkombëtare dhe stabilitetin rajonal në pajtim me qëllimet dhe parimet e kartës së kombeve të bashkuara e do të inicionte edhe procesin e njohjes ndërkombëtare të të dy shteteve. AI akuzoi autoritetet në ukrainë se kanë shkelur të drejtat dhe liritë e banorëve dhe se kanë ngritur një bllokadë të plotë ekonomike mbi të dy rajonet.