Drejtoria e Përgjithshme e Tatimeve ka njoftuar se 31 korriku është afati i fundit për deklarimin e të ardhurave individuale mbi 2 milionë lekë. Afati normal është 30 prilli, por këtë vit u shty për shkak të situatës së krijuar nga koronavirusi. Tatimet njoftojnë individët rezidentë dhe jo rezidentë në Republikën e Shqipërisë, të cilët gjatë vitit 2019 kanë realizuar të ardhura, nga të gjitha burimet, në shumën mbi 2,000,000 (dy milionë) lekë, se brenda datës 31 Korrik 2020 duhet të dorëzojnë në mënyrë elektronike, nëpërmjet sistemit e-filing, Deklaratën Individuale Vjetore të të Ardhurave (DIVA). Të ardhurat e tatueshme, të detyrueshme për t’u deklaruar janë të gjitha përfitimet financiare që vijnë që nga paga, shpërblimet nga marrëdhëniet e punësimit e deri tek ato prej qirave, investimeve e interesave bankare, etj. Në njoftim theksohet se tashmë për herë të parë, deklarata do të gjenerohet e paraplotësuar automatikisht me të dhënat e të ardhurave vjetore bruto nga pagat apo shpërblimet nga marrëdhëniet e punësimit për individët, si edhe me përllogaritjen e Tatimit mbi të ardhurat nga Punësimi. Gjithashtu fushë e paraplotësuar do të jetë edhe vlera e paguar gjatë vitit për sa i takon Tatimit mbi të ardhurat nga Punësimi. Drejtoria e Tatimeve shprehet se deklarimi i të ardhurave, përveç se është detyrim ligjor, i çdo individi subjekt i deklarimit, është edhe një garanci më shumë, lidhur me justifikimin e pasurisë së tij.