Taylor Swift është shpallur Personi i Vitit nga revista ‘Time’, një zgjedhje e duartrokitur nga miliona fansa të saj pas triumfit të turnout ‘The Eras’. Mes shumë komenteve që e uronin, spikati ai i biznesmenit Elon Musk, i cili si një ish mbajtës i të njëjtit titull në vitin 2021, zgjodhi ta paralajmërojë këngëtaren për cfarë vjen më pas. “Urime. Rrezikon njëfarë rënieje të popullaritetit pas këtij çmimi. Flas nga përvoja”, ka shkruar ai me humor në rrjetin social X. Agjencitë ndërkombëtare që komentuan reagimin e Musk, iu referuan edhe vitit që revista “Time” e kishte shpallur Adolf Hitlerin “person i vitit”, në vitin 1938. Një përfaqësues i revistës e ka bërë të qartë, se dhënia e këtij titulli jo gjithmonë duhet të merret pozitivisht, pasi konsiderohet më shumë, si njohje e personit që ka pasur ndikimin më të madh në ngjarjet e vitit, qoftë për mirë apo për keq. Musk u cilësua "Personi i Vitit" nga Time në vitin 2021, por zgjedhja mori reagime dhe provokoi kritika rreth një sërë temash, duke përfshirë trajtimin e dobët të Teslas ndaj punëtorëve dhe shmangien e rregullave të qeverisë. Musk, i cili është presidenti ekzekutiv i të paktën pesë kompanive të ndryshme duke përfshirë Tesla, SpaceX, Neuralink, The Boring Company dhe rrjetin social X, u rendit në listën e 100 njerëzve më me ndikim të Time për herë të pestë në 2023.