Disa politikanë të koalicionit qeverisës por edhe kristiandemokratët në opozitë, në gjermani, kërkojnë furnizimin e Ukrainës me raketat Taurus. Por, kancelari Olaf Scholz vazhdon të refuzojë dërgimin në Ukrainë të raketave gjermane me rreze veprimi 500 km. Ai beson, se këto armë mund të përdoren vetëm me bashkëveprimin e ushtarëve gjermane dhe kjo mund ta përfshinte Gjermaninë në luftë. Edhe gjatë një seance pyetjesh në parlament ai përsëriti lidhur me raketat Taurus: "Ky është kufiri, që unë si kancelar nuk dua ta kaloj." Por duket se prej tij, po distancohen tani edhe disa prej njerëzve të vet. Politikanë të koalicionit qeverisës po bashkëpunojnë me opozitën. Në mediat gjermane, ata akuzojnë Scholzin për një qëndrim "defensiv katastrofal" si dhe për deklarim të rremë. Kur kancelari pretendon, se furnzimi i raketave Taurus e bën Gjermaninë palë në luftë, kjo është "e gabuar, faktikisht dhe juridikisht". E ndërkohë që në gjermani është i ndezur debati, ukraina ushtarakisht ndodhet në pozicion të vështirë.