Delegacionet nga Rusia dhe Ukraina u takuan në Gjenevë të martën për një raund tjetër bisedimesh paqeje të ndërmjetësuara nga Shtetet e Bashkuara të Amerikës. Bisedimet po zhvillohen një javë para përvjetorit të katërt të sulmit për pushtimin e Ukrainës nga Rusia. Kreu i delegacionit ukrainas Rustem Umerov ka thënë se temë e diskutimeve ishin çështjet e sigurisë dhe ato humanitare. Megjithatë, pritshmëritë për ndonjë përparim në dy ditët e planifikuara të bisedimeve në Zvicër janë të ulëta, pasi asnjëra palë nuk është e gatshme të lëvizë nga qëndrimet e saj. Rusia insiston mbi çështjet kryesore territoriale e Ukraina për garancitë e ardhshme të sigurisë, pavarësisht se Shtetet e Bashkuara dhanë afat deri në qershor për një zgjidhje. Delegacioni amerikan kryesohet nga i dërguari i presidentit të SHBA-së, Donald Trump, Steve Witkoff, dhe dhëndri i tij Jared Kushner. Pak orë para se delegacionet të takoheshin në Zvicër, Rusia kreu një sulm të madh ajror ndaj Ukrainës, duke goditur 12 rajone me 400 dronë dhe pothuajse 30 raketa. Të paktën tre persona u vranë nga këto sulme dhe 11 të tjerë u plagosën, ndërsa dëme të mëdha ka pësuar infrastruktura energjetike në disa qytete.