Toka është mbushur plot me gropa në skajin lindor të Johanesburgut, që deri javën e kaluar ishte thjeshtë një kullotë bagëtish e rrethuar me tela me gjemba, por që tani është shndërruar papritur në qendrën e etheve të arit në Afrikën e Jugut. Dhjetëra kërkues pasurie janë dyndur në qytetin Springs, rreth 50 kilometra në lindje të Johanesburgut, duke kërkuar në tokë për ar. Skena i bën jehonë etheve që ndërtuan Johanesburgun, kryeqytetin financiar të vendit, në fillim të shekullit të 20-të. Gërmuesit, të armatosur me kazma, mbërritën atje pothuajse brenda një nate. "Zërat përhapen si një virus", thotë një 33 vjeçar jashtë shtëpisë së tij me pamje nga fusha, duke kujtuar se si u shfaqën për herë të parë kërkuesit e arit, më 8 shkurt. Pushtimi i papritur i Springs pasqyron një tërbim më të gjerë, pasi çmimet e arit janë rritur në mbi 5,000 dollarë për ons këtë vit, më shumë se dyfishi i nivelit të tyre në janar. Sipas banorëve lokalë, dyndja në zonë nisi kur dikush që po hapte një vrimë për të ngulur një shtyllë gardhi vuri re ngjyrën e pazakontë të tokës dhe e provoi atë në ujë, duke zbuluar pjesëzat e cmuara. Lajmi u përhap në mediat sociale dhe brenda disa ditësh fusha u mbush me kërkues ari. Shumica nuk po kërkojnë në fakt pasurinë aq sa mbijetesën në një vend ku papunësia është afër 32 përqind, sipas shifrave qeveritare. "Gjeta vetëm pak," tha një kërkuese duke treguar një pjesë të thoit të saj të vogël. 'Mund të blej ushqim', shton ajo.