Policia ka vijuar kontrollet në rrugë për shoferët që shkelin rregullat e qarkullimit rrugor. Pavarësisht masave përforcuese dhe sensibilizuese, me dhjetëra persona vijojnë të shkelin rregullat e qarkullimit, kryesisht duke drejtuar mjetin nën efektin e alkoolit apo në gjendje të dehur, me shpejtësi që cenojnë sigurinë e jetës në rrugë, apo parakalime të gabuara. Polica e shtetit kaparandaluar 5 ngjarje të mundshme rrugore, në Tiranë, Korçë, Dibër, Sarandë dhe Fier, ku drejtuesit e mjeteve nën efektin e alkoolit xhironin gomat dhe kryenin manovra të rrezikshme në rrugë. Gjithashtu, gjatë 24 orëve të fundit janë arrestuar në flagrancë 10 drejtues mjetesh, nga të cilët 6 për drejtim mjeti në gjendje të dehur dhe 4 shtetas për drejtim mjeti pa leje drejtimi. Plot 29 shoferëve u janë pezulluar lejet e drejtimit si pasojë e shpejtësisë skëterrë në timon që varionin nga 82 km/h në qendrat e banuara, në rrugën interurbane Tiranë-Elbasan deri në 153km/h në rrugën interurbane Durrës-Kavajë. Gjithashtu, janë ndëshkuar me masë administrative 1919 drejtues mjetesh, për shkelje të Kodit Rrugor që përbëjnë rrezik potencial për përfshirje në ngjarje rrugore, konkretisht për parakalime të gabuara, shpejtësi mbi normat e lejuara, përdorim të celularit gjatë drejtimit të mjetit, mosrespektim të semaforit, mospërdorim të kaskës mbrojtëse dhe mosvendosje të rripit të sigurimit, si dhe për mosrregullim shpejtësie dhe manovra të rrezikshme në rrugë.