Rritja e çmimeve në vend, sidomos në harkun kohor të tre muajve të fundit të vitit 2021, u pasqyruar si një efekt normal post pandemik, i cili ka përfshirë të gjithë vendet e botës. Si një vend me tendencë kryesisht importuese, Shqipëria padyshim nuk mund të qëndronte larg valës së ndryshimit të çmimeve. Megjithatë, ajo që vihet re në buxhetin faktik të këtij viti është një rritje në masën 14 miliardë lekë të taksave të mbledhura gjatë këtij vitit. Konkretisht, në aktin normativ “Për buxhetin e vitit 2021” të ndryshuar, i vulosur nga këshilli i ministrave, shkruhet e zeza mbi të bardhë, se janë mbledhur në total plot 18 miliardë lekë brenda këtij viti, duke e çuar realizimin e planit në 105 përqind. Konkretisht janë mbledhur 8 miliardë lekë nga Tatimi mbi Vlerën e Shtuar, 2 miliardë lekë nga Akciza, 1.5 miliardë lekë nga taksa nacionale, 0.5 miliardë lekë nga taksa doganore si dhe 6 miliardë lekë nga kontributet dhe fondet speciale.