Një ditë përpara ndalesës në Athinë, kryeministri Edi Rama u takua me presidentin turk Rexhep Tajip Erdogan. Këtë e tregoi përmes një mesazhi në rrjetin social Facebook, ku përmend faktin që takimi, në dukje mjaft I përmzerët, ka ndodhur në rezidencën verore të kreut të shtetit turk. “ Me Presidentin e Turqisë, mikun e çmuar Rexhep Taip Erdogan, në një nga bisedat gjatë qëndrimit në rezidencën e tij verore në Marmaris, ku folëm gjerësisht për marrëdhëniet mes Shqipërisë e Turqisë, sfidën e kohës për fuqizimin e ekonomisë në kushtet e përballjes me Covid-19, ecurinë e bashkëpunimit dypalësh, si edhe situatën në rajonin e Ballkanit Perëndimor”, ka shkruar Rama. Kryeministri shqiptar të martën udhëton drejt Athinës për të marrë pjesë në forumin e “Economist” me temë “Evropa: Përforcimi i kohezionit në një kohë të trazuar” në cilësinë e kryetar të OSBE, ndërsa në axhendë është dhe një përballje personale me homologun Kyriakos Mitsotakis. Pritet që temë e kësaj bisede të jetë dhe kufiri detar. Rrugëtimi i Ramës vjen në një kohë përshkallëzimi të tensioneve mes Turqisë dhe Greqisë, një situatë që ka detyruar si BE-në dhe Nato-n ku të dyja këto vende janë anëtare, që të vihen në lëvizje për të shmangur një përplasje ushtarake në Mesdhe.