Presidenti francez Emmanuel Macron i përshkroi sulmet amerikane dhe izraelite kundër Iranit si të paligjshme, duke e vendosur Francën në një kurs përplasjeje me Donald Trump. Në një deklaratë televizive të martën, presidenti francez tha se megjithëse Irani "mban përgjegjësinë kryesore" për luftën, sulmet ishin "jashtë kufijve të së drejtës ndërkombëtare". Ai është udhëheqësi i dytë perëndimor që vë në dyshim ligjshmërinë e konfliktit, pas Pedro Sanchez, kryeministrit të Spanjës. Trump tha të martën se do të "ndërpriste të gjithë tregtinë me Spanjën" pasi ushtrisë amerikane iu ndalua të përdorte bazat spanjolle për të nisur sulmet e saj kundër Iranit. Presidenti amerikan tha më herët ndërkohë se Franca "ka qenë e shkëlqyer" në mbështetjen e luftës së tij dhe se Keir Starmer nuk ishte "Ëinston Churchill"-i pasi Kryeministri britanik u vonua në hapjen e bazave për operacionet amerikane. Në përgjithësi evropa ka qenë shumë e kujdeshme në reagimin e saj ndaj luftës. Liderët evropianë kanë zgjedhur të heshtin ose të flasin pa thënë asgjë kur janë pyetur për zhvillimet, pavarësisht se janë prekur drejtpërdrejt nga lufta në Iran. Ky i fundit lëshoi disa dronë drejt bazës britanike në qipro, me njërin prej tyre që cau mbrojtjen dhe goditi bazën duke shkaktuar dëme minimale. Britania e madhe tani ka nisur një destrojer, HMS Dragon, për të mbrojtur Qipron ndërsa Franca ka vendosur gjithashtu një grup sulmi të udhëhequr nga aeroplanmbajtësja Sharl de Gol, në rajon. Edhe Kryeministri i Kanadasë, Mark Carney, tha të mërkurën se sulmet amerikane dhe izraelite ndaj Iranit "duken, në shikim të parë si të papajtueshme me ligjin ndërkombëtar".