Komisioni hetimor për koncesionet e sterilizimit dhe check up-it në shëndetësi zhvilloi këtë të mërkurë mbledhjen e parë për këtë sesion. Mbledhja formale miratoi procesverbalin e mbledhjes së fundit të mbajtur në korrik. Deputetët u dakordësuan për thirrjen e 22 personave, drejtues dhe ish-drejtues të Ministrisë së Shëndetësisë, spitaleve rajonale, spitalit Nënë Tereza dhe të anëtarëve të komisioneve të vlerësimit të ofertave. Mes të personave të thirrur janë edhe Ilir Beqaj, si ish-ministër Shëndetësie, Klodjan Rrjepaj, ish-zv.ministër shëndetësie dhe Ilir Rrapaj, pronari i kompanisë që ka fituar koncesionin e sterilizimit. Beqaj, Rrjepaj dhe Rrapaj aktualisht ndodhen me masë sigurie arrest me burg dhe për marrjen e tyre në pyetje duhet autorizim nga SPAK dhe gjykata. Beqaj është ftuar për t’u pyetur më 9 tetor, ndërsa afati i punimeve të komisionit hetimor përfundon më 22 tetor.