Tre persona të plagosur pas shembjes së një strehe betoni mbi hyrjen e një stacioni hekurudhor në Novi Sad të Serbisë, janë në gjendje kritike për jetën, ka bërë të ditur ministri i Brendshëm i Serbisë, Ivica Daçiç. Ai i tha Radiotelevizionit të Serbisë (RTS) se pasojat kanë qenë të rënda, sepse streha e betonit ishte jashtëzakonisht e rëndë. Si pasojë e këtij incidenti, të ndodhur më 1 nëntor, kanë humbur jetën 14 persona. Shkaqet e rrëzimit të strehës nuk dihen ende. Daçiç tha se pesë persona do të merren në pyetje gjatë ditës lidhur me rastin, dhe se një ditë më parë janë intervistuar 26 persona tjerë, për të kuptuar se kush është përgjegjës për atë që ka ndodhur. Në mesin e të intervistuarve janë punonjësit e Ministrisë së Ndërtimit, Transportit dhe Infrastrukturës, të udhëhequr nga Goran Vesiç.