Kryeministri spanjoll Pedro Sánchez bëri thirrje për përjashtimin e Izraelit nga ngjarjet sportive ndërkombëtare. Për fushatën e tij ushtarake në Rripin e Gazës Izraeli duhet të trajtohet në mënyrë të ngjashme si Rusia për pushtimin e Ukrainës, tha Sánchez para anëtarëve të Partisë së tij Socialiste. Sánchez u bëri thirrje organizatave sportive të shqyrtojnë nëse është etike që Izraeli të vazhdojë të marrë pjesë në garat ndërkombëtare. Të dielën, aktivistë pro-palestinezë ndërprenë fazën e fundit të garës çiklistike Vuelta a España, e cila u shkurtua, sepse protestuesit bllokuan itinerarin. Më herët, ministri spanjoll i kulturës, Ernest Urtasun, tha se spanja duhet të bojkotojë konkursin evropian të këngës Eurovizion, vitin e ardhshëm, nëse izraeli do të marrë pjesë, duke iu bashkuar edhe vendeve të tjera evropiane, mes të cilave edhe sllovenia. Spanja bashkë me Irlandën dhe Norvegjinë kanë njofur zyrtarisht shtetin palestinez, vitin e kaluar, në përpjekje për të rifokusuar vëmendjen te përpjekjet për të gjetur një zgjidhje politike për luftën në Lindjen e Mesme. Qeveria spanjolle ka anuluar ndërkohë një kontratë me vlerë gati 700 milionë euro për blerjen e raketahedhësve të projektuar në Izrael. Konkretisht fjala është për një kontratë që i ishte dhënë një konsorciumi spanjoll për dymbëdhjetë njësi të sistemit të telekomanduar të raketahedhësve Silam, të zhvilluar nga sistemi Puls i grupit izraelit Elbit Systems. Javën e kaluar qeveria spanjolle paraqiti një sërë masash për të "ndaluar gjenocidin në Rripin e Gazës, për të ndjekur penalisht autorët dhe për të mbështetur popullsinë palestineze". Këto masa përfshinin ndër të tjera ndalimin e marrëveshjeve për armë me Izraelin, që përfshin si shitjet ashtu edhe blerjet e armëve.