Prokuroria special ndryshe SPAK ka përfunduar hetimet dhe dosja është dërguar në gjykatë për 3 persona të akuzuar për trafikim të narkotikëve, në kuadër të grupit të strukturuar kriminal, si krijues, organizator dhe drejtues i organizatës kriminale. Të akuzuarit janë Gentian Malindi, Altin Myslihaka dhe Adrian Bega. Sipas dosjes së SPAK, të pandehurit janë bashkëautorë në trafikimin e një sasie kokaine, që vinte nga Ekuadori në drejtim të Shqipërisë, duke kaluar tranzit në portin e Pireut në Greqi. Hetimet e këtij janë zhvilluar në bashkëpunim të ngushtë me autoritetet greke të drejtësisë, duke organizuar edhe dorëzimin e kontrolluar të lëndës narkotike. Ndërkohë është ndarë procedimi penal dhe vazhdon kryerja e veprimeve hetimore edhe për bashkëpunëtorë të tjerë në kryerjen e këtyre veprave penale. Në dosjen tjetër për të njëjtën vepër penale akuzohet Fisnik Sadiku, i njohur edhe me mbiemrin Smaili. Nga hetimi i kësaj çështjeje ka rezultuar se me datë 18.10.2018, në fshatin Brenogë, Has, është sekuestruar sasia e lëndës narkotike prej 182.5 kg, të llojit heroinë, një laborator që shërbente për prodhimin e lëndës narkotkike, ndërsa në Prishtinë, me datë 02.12.2018, është sekuestruar sasia e lëndës narkotike të trafikuar, prej 113.5 kg e llojit heroinë.