Intervista e presidentit të Rusisë, Vladimir Putin, me Tucker Carlson, komentuesin amerikan i cili ka bërë emër duke përhapur teori konspiracioni dhe ka vënë në pikëpyetje mbështetjen e Uashingtonit për Kievin në luftën e tij kundër trupave pushtuese ruse, është kritikuar ashpër sepse i ka dhënë një platformë propaganduese liderit rus në intervistën e tij të parë me një gazetar amerikan që kur Rusia nisi pushtimin e plotë të Ukrainës para dy vitesh. Gjatë intervistës, Putini përsëri pretendoi se Ukraina ishte kërcënim për Rusinë, sepse Perëndimi po e tërhiqte këtë vend drejt NATO-s, gjë që është mohuar plotësisht nga aleanca ushtarake, ndërsa ka shmangur temat si, lufta e tij brutale ndaj shoqërisë civile dhe lirisë së shprehjes në Rusi. Putini i bëri thirrje Shteteve të Bashkuara t’i bëjnë trysni Kievit që të ndalë luftimet dhe të arrijë marrëveshje me Rusinë, e cila ka pushtuar një të pestën e Ukrainës. Carlson rrallëherë e sfidoi Putinin, i cili foli gjerë e gjatë për historinë e Rusisë dhe Ukrainës.