Pas situatës së tensionuar dhe protestës së të burgosurve në disa burgje ku në Peqin disa prej tyre nisën edhe grevën e urisë, ka reaguar ministria e Drejtësisë dhe drejtoria e burgjeve. Përmes një njoftimi për shtyp Ministria e Drejtesisë ka bërë të ditur se situata është drejt normalizimit dhe problemet e ngritura nga të burgosurit po shyrtohen nga një grup pune i posacëm me qëllim gjetjen e zgjedhjes dhe respektimin e te drejtave të të dënuarve sipas ligjeve ne fuqi. Po ashtu bëhet me dije se ka nisur një hetim i gjerë për të zbuluar faktorët që nxitën këtë situatë. “Shërbimi i Kontrollit të Brendshëm të Burgjeve dhe Drejtoria e Përgjithshme e Burgjeve në bashkëpunim me agjencitë e specializuara të shtetit kanë filluar hetimin për të gjithë elementët dhe faktorët e brendshëm apo të jashtëm që kanë synuar provokimin dhe nxitjen e kësaj situate me qëllim destabilizimin e sigurisë në burgje”. thuhet ne deklaratën e ministrisë së drejtesisë . Po ashtu ministria e Drejtësisë ben të ditur se refuzimi i ushqimit për disa ditë nga disa të burgosur ne Peqin, është mbyllur të premten në 9 tetor. “Ata kanë paraqitur kërkesa të karakterit legjislativ për heqjen e dënimit me burgim të përjetshëm, uljen e dënimeve, amnisti, etj. Shkaku kryesor i fillimit të saj është inicuar nga subjekte të Regjimit 41bis, pavarësisht përhapjes së saj edhe në grup të dënuarish të tjerë në disa institucione të tjera. Të dënuarve ju është mundësuar adresimi i shqetësimeve të tyre ligjore nëpërmjet përfaqësuesve ligjorë dhe organizmave monitoruese të të drejtave të njeriut”, thuhet ne njotuimin per shtyp te ministrisë së drejtësisë. Burgu i Peqinit u përfshi nga protesta këtë javë, ku të burgosurit dërguan një liste me 13 kerkesa institucioneve, duke kërkuar edhe takim me avokatin e popullit. Protesta e të denuarve ne Peqin u mbeshtet ne mjediset e Jashtme edhe nga familjarë të tyre. Një ndër kërkesat e të dënuarve ishte konvertimi i denimit me burg të përjetshëm në 25 vite burg. Po ashtu edhe ne burgun e Recit, ne Malesine e Madhe, te burgosurit pak ditë më parë protestuan dhe një pjesë e tyre refuzuan edhe ushqimin. Të burgosurit e Recit, kanë kundërshtuar moslejimin e takimeve me familjarët që prej fillimit të pandemisë si masë parandaluese për përhapjen e covid 19 si dhe atë të përfitimit të lejes shpërblyese, edhe pse tashmë aki normativ për masat e jashtëzakonshme ka përfunduar.