Shqipëria ende nuk është një vend që ka detyrim ligjor për fatkeqësitë natyrore. Tërmeti i 26 nëntorit lindi nevojën për një ligj të tillë, që ende nuk ka marrë formë përfundimtare. Modelet e skemave të detyrueshme ose me pjesëmarrje publike të sigurimit të fatkeqësive u takojnë kryesisht vendeve në zhvillim që janë të ekspozuara ndaj fatkeqësive të shpeshta natyrore. Modeli i propozuar për Shqipërinë mbështetet kryesisht në modelin e Turqisë. Në vitin 2000, Turqia ngriti me asistencën e Bankës Botërore një agjenci kombëtare të sigurimit të katastrofave, që financohet nëpërmjet sigurimit të detyrueshëm të ndërtesave. Skema financohet me prime tregu, pa subvencione nga qeveria dhe ofron mbulim nga tërmetet dhe zjarret. Mbulimi maksimal që ofrohet nga skema është afërsisht 80 mijë USD, ndërsa dëmet përtej kësaj shume mund të mbulohen vetëm me sigurimin vullnetar të pronës në kompanitë private. Primi i sigurimit është i ndryshueshëm në varësi të llojit të ndërtimit dhe nivelit të riskut nga tërmetet, i ndarë sipas zonave të veçanta të vendit, por, në vlera mesatare është afërsisht 33 USD në vit.