Shoferët që kanë një të kaluar me aksidente automobilistike do të paguajnë më shtrenjtë se të tjerët sigurimin e detyrueshëm për mjetet që kanë në pronësi. Ky është një nga ndryshimet që parashikon ligji i ri për sigurimin e mjeteve automobilistike. Top News ka siguruar projektligjin që Ministria e Financave ka hartuar “Për sigurimin e detyrueshëm në sektorin e transportit” i cili pritet së shpejti të shkojë në Kuvend për të kaluar procedurat parlamentare. Sipas këtij projektligji kompanive të sigurimeve do t’u jepet e drejta për të aplikuar sistemin Bonus-Malus. Siç përcaktohet qartë në nenin 8 të këtij projektligji “Bonus-malus” është sistemi për përcaktimin e nivelit të primit të sigurimit të detyrueshëm motorik, bazuar në historikun e dëmeve të të siguruarit. Sistemi bonus-malus, është një nga faktorët e riskut, të cilin shoqëritë e sigurimit kanë të drejtë ta zbatojnë në tarifimin e sigurimit të përgjegjësisë së të siguruarit të mjetit motorik, për dëmet shkaktuar palëve të treta nga përdorimi i këtij mjeti. Pra nëse pronari i mjetit ka një historik me aksidente atëhere koeficenti I riskut I tij llogaritet më I lartë, ndaj edhe pagesa e sigurimit vjetor të detyrueshëm del më I lartë.