Skandali i rjedhjes së të dhënave sensitive të më shumë se 600 mijë qytetarëve, ka marrë përmasa të pamenaxhueshme si dhe ka vënë të dispozicion të keqbërësve detaje, të cilat mund të keqpërdoren. Ajo që bie në sy është se në muajt që këto të dhëna shkarkoheshin e përpunohesh në mënyrë të paligjshme jashtë sistemit të Agjencisë së Shoqërisë së Informacionit, kjo e fundit zhvillonte një tender për blerje shërbimit të automatizimit dhe monitorimit të aktivitetit për inspektorët tatimorë. Plot 100 milionë lekë ka qenë oferta e tenderit të fituar për të siguruar monitorimin e aktivitetit të personave që kishin akses në sistem. Sipas formularit të njoftimit të fituesit të Agjencisë së Shoqërisë së Informacionit, tenderi është publikuar në faqen elektronike të Agjencisë së Prokurimit Publik. Në përshkrimin e shkurtër të kontratës përcaktohet: “Blerje shërbim automatizimi dhe monitorimi të aktivitetit për inspektorët” për Drejtorinë e Përgjithshme të Tatimeve. Shërbimi në fjalë gjurmon aktivitetin e inspektorëve të tatimeve në sistemet e Agjencisë së Shoqërisë së Informacionit me të dhënat e qytetarëve për të monitoruar kontrollet që ata kryejnë. Fondi limit i vendosur në dispozicion nga AKSHI për këtë tender ishte 106 milion lek. Në tender morën pjesë tre kompani, ku dy të tjerat nuk paraqitën oferta dhe automatikisht, pa garë fituese u bë kompania e tretë.