Kriptomonedhat po bëhen pjesë e ekonomisë vendase gjithmonë e më shumë, e teksa mundësitë për përfitime janë të shumta, po aq janë edhe risqet. Për shkak të kompleksitetit dhe anonimitetit të tyre, transaksionet me kriptomonedha kanë nivelin më të lartë të rrezikut të pastrimit të parave dhe financimit të terrorizmit. Monedhat virtuale, nuk lëshohesh apo kontrollohen nga ndonje organ shteteror ose autoritete qëndrore, ato menaxhohen nga rrjetet peer-to-peer që punojnë me software falas. Në përgjithësi, kushdo që dëshiron të marrë pjesë në këtë system është në gjendje të bëjë këmbime parash virtuale . Megjithëse transaksionet verifikohen nga nje teknologji e quajtur blockchain, mungesa e një kuadri ligjor apo rregullator qeveritar bën që në momentin kur humbasin paratë, qytetarët nuk kanë ku raportojnë. Pak ditë më parë, ‘Financial Times’ ka paralelizuar sistemin e kriptomonedhave me firmat piramidale të viti 1997 në Shqipëri. Megjithëse dy skemat janë totalisht të ndryshme, ekziston një e përbashkët: marketingu i egër dhe premtimet e larta për përfitime marramendëse shndërrojnë një sistem informal dhe të decentralizuar, mjedis ideal për krimin, në një mani të pranuar gjerësisht që grabit paratë e shumë njerëzve. Magjia e parave dhe mundësia për të fituar shumë në pak kohë krijon një mjedis të pakontrolluar nga ligje efektive, i cili mund të çojë gjithë vendin për pak kohë në kolaps dhe mund të kthejë teknologjinë në tragjedi nëse nuk ka ndërhyrje shtetërore.