Bordi i transparencës ka rritur sërish çmimet e karburanteve. Sipas çmimeve të reja, nafta do të shitet 2 lekë më shtrenjtë, duke shkuar në 219 lekë në tregun e pakicës dhe 207 lekë në atë të shumicës. Me rritje është rishikuar edhe çmimi i shitjes së benzinës. Sipas çmimeve të reja të vendosura nga bordi benzina rritet me tre lekë, si në tregun e pakicës ashtu edhe në atë të shumicës. Vendimi i ri përcakton se çmimi tavon për benzinën do të jetë jo më shumë se 196 lekë për litër te pakica dhe jo më shumë se 184 lekë për tregtimin me shumicë. Bordi thotë se çmimet e vendosura do të jenë në fuqi deri në një vendim të ri dhe se niveli tavan i tyre përcaktohet në bazë të luhatjes në bursat ndërkombëtare. Qeveria vendosi ringritjen e bordit në mbledhjen e 16 shtatorit pas rritjes së fortë të çmimeve të karburanteve, ku një litër naftë arriti deri në 230 lekë në pikat e shitjes me pakicë.