Një shqiptar me dy identitete që kërkohej nga Italia, por që strehohej në Shqipëri për t’i shpëtuar drejtësisë nuk ka mundur më shumë se kjo e martë. Agjentët e antitrafikut në policinë e Tiranës, bazuar në disa të dhëna në rrugë operative, ranë në gjurmë të 45 vjeçarit Rajmond Hoxhaj, alias Eduart Dhamo. Ndërrimi i identitetit të tij duket se ka shërbyer si motiv edhe për të vendosur kodin e operacionit policor “alias”. Në sheshin ‘Rilindja’ në Tiranë, ka mbërritur një numër i lartë efektivësh nga Forcat e Posaçme ‘Shqiponjat’, Fast Albania si dhe Interpol. Menjëherë është bërë e mundur identifikimi dhe kapja e 45 vjeçarit, me qëllim ekstradimin e tij drejt Italisë. Prej disa vitesh emri i Hoxhajt ka qenë i përfshirë në grupe kriminale të trafikimit të lëndëve narkotike. Për këto vepra gjykata e Milanos në Itali e ka dënuar me 24 vite burg. Finalizimi i operacionit policor të koduar ‘Alias’ do të pasohet me një bashkëpunim me homologët e Interpol në Itali, për të realizuar ektradimin e Hoxhajt drejt shtetit fqinj, ku pritet të vuajë dënimin.