Kërkesat për azil nga qytetarët shqiptarë në vendet e Bashkimit Evropian kanë shënuar një rënie të ndjeshme gjatë gjysmës së parë të vitit 2025. Të dhënat e publikuara nga Eurostat, sipas Monitor tregojnë se nga janari deri në korrik janë regjistruar gjithsej 3 mijë e 100 aplikime për mbrojtje ndërkombëtare, duke u ulur me 28 për qind krahasuar me të njëjtën periudhë të vitit të kaluar. Krahasuar me vitin 2022, kur numri i kërkesave arriti në 7 mijë e 200, aplikimet janë më shumë se përgjysmuar. Sipas raportit, Franca mbetet vendi më i preferuar për azilkërkuesit shqiptarë, e ndjekur nga Gjermania, kryesisht për shkak të politikave sociale më të favorshme. Ndërsa azilkërkimet janë në rënie, Eurostat thekson se forma më e përhapur e emigrimit janë lejet e punës. Vetëm në periudhën 2022–2024 janë dhënë mesatarisht 20 mijë leje pune në vit, kryesisht në Itali, Greqi dhe Gjermani. Sipas Eurostat, këto të dhëna tregojnë një ndryshim të dinamikës së emigracionit, me më pak azilkërkues dhe më shumë punëtorë ekonomikë.