Në një reagim në FaceBook, BDI ka ngritur shqetësimin e mosrespektimit të gjuhës shqipe në faqet zyrtare të ministrive të Qeverisë së Maqedonisë së Veriut. BDI shkruan se mungesa e përmbajtjeve në gjuhën shqipe në Ministrinë e Energjetikës, të Transportit, të Punëve të Brendshme dhe në institucione të tjera përbën jo vetëm shkelje të Ligjit për Përdorimin e Gjuhëve, por edhe përjashtim të qëllimshëm të qytetarëve shqiptarë nga qasja në informatat publike. Sipas BDI, pavarësisht se disa formate të vjetra në gjuhën shqipe kanë mbetur, përmbajtjet konkrete, dokumentet dhe informacionet kryesore figurojnë në maqedonisht. Kjo, është një politikë institucionale, që kufizon përdorimin te gjuhës shqipe dhe rrënon bazat e barazisë ndëretnike në shtet, shkruhet më tej në postim. BDI shprehet se institucionet shtetërore po injorojnë përdorimin e gjuhës shqipe, një ndër arritjet më të rëndësishme të Marrëveshjes Kornizë të Ohrit. Kjo sipas tyre po bëhet qëllimisht, për të dërguar një mesazh të rrezikshëm për të ardhmen e kohezionit shtetëror dhe bashkëjetesës ndëretnike. “Shqiptarët nuk do të pranojnë të trajtohen si qytetarë të rendit së dytë. Barazia gjuhësore nuk është privilegj – është e drejtë”, përfundon postimin BDI.