Shqipëria renditet ndër vendet me numrin më të lartë të të burgosurve për 100 mijë banorë në Europë. Sipas statistikave të publikuara nga Këshilli i Europës, janë plot 178 të burgosur për 100 mijë banorë në Shqipëri, një shifër kjo më e lartë sesa mesatarja e europiane e cila nuk e kalon nivelin e 124 të burgosurve për 100 mijë banorë. Ajo që bie në sy në statistika, është numri i të burgosurave femra në Shqipëri. Vetëm 1.8 për qind e të burgosurve janë gra, cka e rendit vendin tonë ndër të fundit në Europë për këtë tregues. Kohëzgjatja mesatare e dënimit në vendin tonë është 15.7 vite, një shifër kjo më e lartë sesa mesatarja e Europës, e cila arrin në 11 vite dënim. Për Shqipërinë, shpenzimet e administratës së burgjeve vlerësohen në rreth 46 milionë euro në vit, bazuar kjo në shifrat e vitit 2019. Për një total prej 5063 të burgosurish deri më 31 janar të vitit të kaluar, rezulton se kostoja mesatare vjetore për një të burgosur në vendin tonë shkon në rreth 9 mijë euro. Duke pasur parasysh se kohëzgjatja mesatare e dënimit në vendin tonë është 15.7 vite, rezulton se kosto mesatare për një të burgosur fiksohet në rreth 142 mijë euro, në rast se shpenzimet i llogarisim të qendrueshme nga viti në vit.