Rrugë të reja partneriteti mes Shqipërisë dhe Emirateve të Bashkuara Arabe pritet të çelen në sektorët prioritarë duke filluar nga energjia e rinovueshme e deri tek siguria ushqimore, që gjatë ditëve të fundit ka qenë kryefjala e qeverisë shqiptare. Presidenti i Emirateve të Bashkuara Arabe, Sheikh Mohamed bin Zayes Al Nahyan u prit në aeroportin ‘Nënë Tereza’ nga kryeminsitri Edi Rama dhe ministrat Belinda Balluku e Igli Hasani. Në ambjentet e kryeministrisë, udhëheqësit e dy vendeve së bashku me përfaqësues të qeverive diskutuan për rrugët e reja të bashkëpunimit veçanërisht në sektorët prioritarë duke filluar nga energjia e rinovueshme, tregtia, ekonomia, siguria ushqimore dhe teknologjia. Ndër të tjera në fokus të kësaj vizite ishin çështjet rajonale dhe ndërkombëtare me interes të ndërsjelltë. Sheikh Mohamed bin Zayed riafirmoi angazhimin e Emirateve të Bashkuara Arabe për të ndërtuar partneritete të forta në të gjithë Ballkanin, duke konsideruar Shqipërinë si një partner kyç. Kryeministrit Rama i akordoi presidentit të Emirateve të Bashkuara urdhrin “Ylli i Mirënjohjes Publike”.