Shqipëria është vlerësuar si lider në Ballkanin Perëndimor për transformimin digjital. Ky vendim erdhi pas analizës së bërë mbi performancën për 52 indikatorë në 6 fusha të mirëqeverisjes dhe administrimit publik, në të gjashtë vendet e Ballkanit Perëndimor. Ky vlerësim u artikulua në Ministerialin Rajonal për Mirëqeverisjen dhe Administrimin Publik, më datë 22 shkurt, ku pjesë në këtë takim morën të 6 liderët e Ballkanit Perëndimor, të cilët prezantuan progresin lidhur me këtë reformë. Vendi ynë ka kryer disa reforma të rëndësishme në shumë fusha të administratës publike gjatë viteve të fundit. Mirëpo, në kuadër të ofrimit të shërbimeve p[ublike dhe mirëqeverisjes, ky vlerësim e bën Shqipërinë të rënditet në vendin e parë për transformimin digjital dhe ofrimin e shërbimeve online. Kalimi i shërbimeve publike nga fizikisht në elektronikisht është njëra anë e medaljes, por duket se Shqipëria është vlerësuar edhe për performancën e deritanishme të tyre. Qytetarët duket se janë të kënaqur dhe e kanë përqafuar digjitalizimin. Revolucioni digjital në Shqipëri do të vazhdojë. Udhërrëfyesi për Reformat e Mirëqeverisjes 2030 do të jetë platforma kryesore që do të orientojë reformën e administratës publike, reformën e financave publike, shërbimeve publike, digjitalizimin, antikorrupsionin dhe reformën e decentralizimit.