Sërish edhe këtë të enjte nuk është raportuar asnjë viktimë nga Covid 19. Numrat e personave të infektuar gjithashtu kanë pësuar rënie. Situata në spitale është paraqitur e qetësuar dhe në një kohë të shkurtër pritet që situata e koronavirusit të stabilizohet plotësisht. Ministria e Shëndetësisë ka bërë me dije se në 24 orët e fundit janë kryer 2648 testime, nga të cilat vetëm 11 qytetarë kanë rezultuar poziitvë me Covid 19. Rastet pozitive janë konfirmuar, 5 raste në Tiranë, 3 raste në Elbasan, 1 rast në Malësi e Madhe, Bulqizë dhe Kolonjë. Po në harkun kohor të 24 orëve të fundit, janë shëruar 24 pacientë duke e çuar numrin e të shëruarve në 129 mijë e 785 që nga fillimi i epidemisë. Aktualisht në spitale, 20 pacientë po marrin trajtim spitalor, nga të cilët 6 prej tyre janë në terapi intensive. Këtë të enjte Ministria e Shëndetësisë gjithashtu njoftoi se që nga fillimi i vaksinimit deri tani, janë kryer 816 mijë e 556 doza të vaksinës kundër koronavirusit. Prej tyre, vetëm 320 mijë e 532 persona i kanë marrë të dyja dozat e vaksinës antiCovid.