Në raport me Popullsinë, Shqipëria ka një numër të lartë aksidentesh me pasoja fatale. Qendra Kombëtare e Urgjencës Mjekësore deklaron se gjatë vitit që u mbyll edhe pse kishte një kufizim të lëvizjes për shkak të pandemisë, u regjistruan 6248 aksidente rrugore dhe 159 persona humbën jetën. Qendra Kombëtare e Urgjencave Mjekësore ka 13 këshilla për drejtuesit e makinave dhe qytetarët për të shmangur aksidentet. Urgjenca gjithashtu ka bërë edhe një bilanc të llojeve të aksidenteve të ndodhura në Shqipëri, duke i ndarë në disa kategori si: "Kodi i Zi: 159 aksidente me pasojë vdekjen; Kodi i Kuq: 1475 aksidente me rrezikshmëri të lartë për jetën; Kodi i Verdhë: 2951 aksidente me dëmtime, por jashtë rrezikut për jetën; Kodi Jeshil: 1549 aksidente jashtë rrezikut për jetën; Kodi i Bardhë: 114 aksidente pa dëmtime dhe jashtë rrezikut për jetën". Duke shprehur shqetësimin për numrin në rritje të aksidenteve rrugore, Qendra Kombëtare e Urgjencave Mjekësore ju këshillon të drejtoni mjetin tuaj me kujdes dhe brenda normave të lejuara. 13 janë këshillat e Urgjencës Kombëtare, të cilat fillojnë me respektimin e rregullat e qarkullimit rrugor dhe sinjalistikën vertikale e horizontale, kontrollin e mjetit përpara nisjes, respektimin e shpejtësisë dhe ngadalësimin e saj, vendosjen e rripit të sigurimit, mbajtjen e fëmijëve në sediljen e dedikuar. Një tjetër këshillë për shmangien e aksidenteve fatale lidhet me mosparakalimin në zonat urbane, ku gjithnjë ka lëvizje të këmbësorëve. Nisur nga aksidentet edhe mbi vijat e bardha, urgjenca kombëtare është në të njëjtin mendim me policinë rrugore teksa kërkon respektim të tyre. Dy këshilla të tjera lidhen me pijet alkoolike, apo lëndët narkotike, për të cilat në asnjë rast nuk duhet të drejtoni makinën, pasi është një rrezik për veten dhe të tjerët që përdorin rrugën.