Duke e konsideruar Bashkimin Europian ‘një perandori’ që tashmë ka hapur dyert për Shqipërinë; shefi i ekzekutivit shqiptar, Edi Rama në një intervistë për Euroneës, foli për planet e zgjerimit të unionit europian. Rama u shpreh se imazhi për Shqipërinë ka ndryshuar në arenën ndërkombëtare, megjithëse problemet me krimin e organizuar vijojnë të jenë prezente. Rama: “Imazhi ka ndryshuar tashmë dhe ndryshon çdo ditë, sepse Shqipëria nuk është më ajo gropa e zezë në mes të Europës. Një gropë ku të gjithë imagjinonin mafie, kriminelë, drogë, prostituta dhe çdo të keqe të mundshme. Tashmë, Shqipëria është një vend rrezatues që vijnë ta vizitojnë miliona e miliona europianë, të cilët e shohin që ajo është një pjesë Europe, e cila duhet të jetë pjesë e mozaikut. Ndërkohë, a kemi ende probleme me krimin e organizuar? Po, kemi. Kush nuk ka? Ja shihni këtë qytet për shembull dhe, prapë, këtu ndodhin gjëra të jashtëzakonshme. A kemi probleme me drogën? Kush nuk i ka? Sigurisht, na duhet të luftojmë, lufta nuk mbaron kurrë, siç e tregon edhe shembulli i Europës. Europa e ka luftuar drogën pafund, por droga është ende e pranishme në Europë dhe lufta vazhdon.” I pyetur për kiminë e tij të veçantë me kryeministren italiane, Giorgia Meloni, numri një i qeverisë shqiptare u shpreh se historikisht qeveria shqiptare ka pasur marrëdhënie të ngushta me homologët italianë.