Në një botë që vuan ende pasojat e pandemisë COVID-19, përhapja e mundshme e një tjetër sëmundjeje ka vënë në alarm autoritetet shëndetësore në mbare globin. Lia e majmunëve është një infeksion viral që njihet prej dekadash, por rastet aktuale janë të pazakonshme, për shkak të përhapjes së gjerë gjeografike. Organizata Botërore e Shëndetësisë ka thënë se situata duhet të përcillet me seriozitet, por ka bërë thirrje se nuk ka vend për paniku, duke theksuar se sëmundja është ende “nën kontroll”. “Është e rëndësishme të kuptojmë tani se ky shpërthim mund të frenohet me anë të gjurmimit të kontakteve dhe izolimit”, ka OBSH në një deklaratë. Lia e majmunëve është zbuluar për herë të parë në vitin 1958, në Afrikë. Rasti i parë tek njerëzit është regjistruar në vitin 1970 në Republikën Demokratike të Kongos. Deri më tani, lia e majmunëve ka qenë e përqendruar vetëm në një numër të vogël të vendeve afrikane. Rastet e eksportuara tjetërkund kanë qenë të rralla ose joekzistente.