Shpërthime tronditën qytetet perëndimore të Ukrainës, Lviv dhe Ternopil, të mërkurën, raportuan mediat ukrainase, pasi ushtria e vendit raportoi sulme me raketa dhe dronë rusë. "Rusia po sulmon përsëri infrastrukturën tonë energjetike," tha Ministria e Energjisë e Ukrainës në aplikacionin e mesazheve Telegram. "Ndërprerje emergjente të energjisë elektrike janë në fuqi në një numër rajonesh të Ukrainës", shtoi ajo. Shkalla e plotë e dëmit nuk u bë menjëherë e qartë. Media shtetërore ukrainase raportoi se një ndërtesë banimi shumëkatëshe ishte goditur në Ternopil, ndërsa një dëshmitar i Reuters raportoi ndërprerje të energjisë elektrike në Lviv gjatë sulmit. Guvernatori Rajonal tha në Telegram se sulmi dëmtoi një objekt energjetik dhe goditi një vend industrial në rajonin e Lvivit, por nuk shkaktoi viktima, pa dhënë detaje të mëtejshme. Imazhet e publikuara në kanalet në Telegram treguan një bllok kullash në Ternopil me katet e sipërme të shkatërruara, me një kolonë tymi të zi që ngrihej në qiell dhe zjarrin që ende vazhdonte të digjej. Presidenti ukrainas, Volodimir Zelenski, konfirmoi më pas se nëntë persona janë vrarë në sulmet ruse mbi Ukrainë gjatë natës. Sipas tij, Rusia lëshoi më shumë se 470 dronë dhe 47 raketa në sulm. Tre lagje të qytetit të dytë më të madh të Ukrainës, Harkiv, u goditën nga një sulm masiv me dronë i cili plagosi më shumë se 30 persona, përfshirë fëmijë.