Dy shtetas shqiptarë të moshës 37 dhe 44 vjeç, të identifikuar si Petrit Myzyri nga Berati dhe Daniel Dhamaj nga Vlora, janë vënë në pranga ditën e mërkurë në ishullin grek të Mykonos, ndërsa ndaj tyre është ngritur akuza për për posedim, ruajtje dhe trafikim të lëndëve narkotike. Sipas hetimeve, autorët po trafikonin një sasi të madhe lënde narkotike, të cilën e kishin fshehur në një makinë private të parkuar. Në kuadër të operacionit, policia greke, ushtroi kontrolle në një banesë, dy makina private dhe një motocikletë. Sipas policisë, dy shqiptarëve iu sekuestruan 365.8 gramë MDMA të ndarë në 6 pako, rreth 76 gramë kokainë rozë, e ndarë në 19 pako, rreth 36 gramë kokainë të ndarë në 41 pako, 65,900 euro dhe 125 dollarë amerikanë, të fituara nga trafikimi i drogës, 3 telefona celularë, peshore precize, materiale paketimi.