Procesi i fiskalizimit në vend krahas shpenzimeve që ka për biznesin privat, duket se ze një hapësirë të konsiderueshme edhe në buxhetin e shtetit. Këshilli i ministrave ka miratuar një vendim për rishpërndarje fondesh. Sipas këtij vendimi është shtuar një fond prej 30 milionë lekësh në programin buxhetor “Menaxhimi i të ardhurave tatimore”. Kjo sasi parash konkretisht do të shkojë për të përballuar shpenzimet kapitale për projektin “Përmirësimi i modulit të menaxhimit të kontrollit të faturimit”. Referuar publikimit të këshillit të ministrave, në këtë vit shkollor ku arsimi po përballet me sfida të mëdha si pasojë e pandemisë globale, kjo VKM parashikon se 30 milionë lekë do t’i hiqen programit të arsimit të mesëm profesional, për të cilin parashikohen të kryhen më pak shpenzime kapitale dhe do të shkojnë për të menaxhuar kontrollin e faturimit tatimor.