Një grua ka humbur jetën dhe nëntë të tjerë janë lënduar pas shpërthimit të një zjarri në jug të Francës, thanë zyrtarët lokalë të mërkurën. Si pasojë e zjarrit janë djegur 11.000 hektarë tokë. Zjarri, që nisi të martën pasdite, ka shkatërruar apo dëmtuar 25 shtëpi në Aude. Në këtë zonë, 1.500 zjarrfikës janë angazhuar për të shuar flakët. Gruaja që humbi jetën, ishte në shtëpinë e saj, kur ndërtesa u përfshi nga flakët. Autoritetet po ashtu njoftuan se shtatë zjarrfikës kanë pësuar lëndime në luftë me flakët, dy prej të cilëve janë shtruar në spital. Ndërkaq, një person konsiderohet i zhdukur. “Zjarri po përparon në një zonë ku të gjitha kushtet janë të favorshme për përhapjen e tij. Po monitorojmë skajet dhe pjesën e pasme të zjarrit për të parandaluar vatra të reja”, tha Lucie Roesch, sekretare e përgjithshme e prefekturës Audes. Ajo paralajmëroi se vatra e zjarrit pritet të mos shuhet për disa ditë. “Është një operacion i gjatë”, tha Roesch. Vitet e fundit, në këtë pjesë të Francës ka pasur disa vatra zjarri. Shkencëtarët thonë se ndryshimet klimatike, të nxitura nga njeriu, po bëjnë që ngjarje të motit ekstrem të jenë më të shpeshta, më intensive dhe të zgjasin më shumë.