Ka shkuar në 39 mijë numri I viktimave palestineze, të vrara nga sulmet izraelite. Ministria e Shëndetësisë e qeverisë së Hamasit në Rripin e Gazës tha në një deklaratë se kjo është shifra e 10 muaj luftimesh, ku vetëm në 48 orët e fundit janë vrarë rreth 100 persona, shumica prej tyre civilë të pafajshëm. Sipas po të njëjtave burime, të paktën 13 persona u vranë në tre sulme ajrore izraelite që vunë në shënjestër kampet e refugjatëve në Gazën qendrore të shtunën gjatë natës, ndërsa bisedimet për armëpushim në Kajro duket se po shënojnë përparim. Midis viktimave në këtë kamp ishin tre fëmijë dhe një grua. Nga ana tjetër, të paktën 25 persona u vranë në bastisjet izraelite të nisura në orët e para të mëngjesit të sotëm në Rripin e Gazës, dhe 5 persona humbën jetën pas një sulmi në lagjen Sheikh Radwan të qytetit të Gazës (në veri). 4 të tjerë, duke përfshirë dy fëmijë, ndërruan jetë në një sulm në Jabalia (veri). Mbi 10 viktima janë shënuar edhe në kampet Nuseirat e Khan younis, si pasojë e sulmeve ajrore me drone. Gjatë natës, luftëtarët izraelitë goditën depot e armëve të Hezbollahut në Tayr Harfa dhe Blida, në Libanin jugor.