Një autobus u përfshi nga flakët në Zvicrën perëndimore të martën duke vrarë të paktën gjashtë persona dhe duke plagosur pesë të tjerë në atë që policia tha se ishte një akt i qëllimshëm. Zjarri shpërtheu në një autobus në rrugën kryesore të qytetit të vogël Kerzers, rreth 20 kilometra në perëndim të kryeqytetit zviceran Bernë, rreth orës 18:25 minuta. Videot që qarkullojnë në mediat sociale tregojnë flakë disa metra të larta që dalin nga dritaret dhe tym të zi që ngrihet në qiell. Zjarri "la të paktën gjashtë të vdekur dhe pesë të plagosur, tre prej tyre në gejndje rëndë", tha për AFP një zyrtar i policisë. "Policia aktualisht po e trajton zjarrin si një incident të shkaktuar nga njeriu, dhe madje edhe një akt të qëllimshëm", tha ai, pa dhënë detaje të mëtejshme. Një hetim ka nisur tani nga prokurorët publikë për të përcaktuar rrethanat e sakta të tragjedisë. Një gazetar i AFP-së pa se pjesa e djegur e autobusit ishte e mbuluar me tenda të bardha. Vendi i ngjarjes ishte i rrethuar, me policë të vendosur përgjatë shiritit. Zjarrfikësit dhe makinat e zjarrfikësve ishin gjithashtu të pranishme. Mediat vendase raportuan ndërkohë se një burrë, brenda në autobus, ishte lyer me benzinë dhe i kishte vënë flakën vetes. Ato cituan dëshmitarët okularë të rrëfenin këtë version të ngjarjes megjithëse policia nuk dha asnjë konfirmim.