Policia e Tiranës ka gjobitur me nga 1 milion lekë, 4 subjekte që ushtronin aktivitet të shoqëruar me muzikë të lartë, në kundërshtim me Aktin Normativ dhe urdhrin e Ministrisë së Shëndetësisë. Sipas njoftimit për shtyp të policisë së Tiranës, subjektet u kontatuan me shkelje gjate kontrolleve te ushtruara ne zona te ndryshme te Tiranes me qëllim parandalimin e përhapjes së COVID-19 dhe në zbatim të Aktit Normativ të 20 korrikut 2020 që përcakton se “Në çdo mjedis shërbimi ndalohet muzika pas orës 20:00”. “Në përfundim të veprimeve të para u mor masë administrative gjobë 1.000.000 lekë, për secilin nga 4 subjektet e konstatuara në shkelje të Aktit Normativ. Policia e Tiranës apelon për të gjithë administratorët e subjekteve që ushtrojnë aktivitet, të respektojnë me rigorozitet protokollet e sigurisë dhe masat kufizuese, me qëllim parandalimin e përhapjes së COVID-19” thuhet ne njoftimin e policisë. Vendimi për ndalimin e aktivitetit të klubeve dhe lokaleve të natës me muzike live dhe moslejimi i muzikës së lartë në baret e restorantet e tjera, u mor nga komiteti teknik i ekspertëve javën e kaluar si një masë për të parandaluar përhapjen e koronavirusit, duke marrë shkas nga numri i lartë i infektimeve që vazhdon prej javësh .