Ministrja e Shëndetësisë Ogerta Manastirliu, përmes një postimi në Facebook, ka ftuar të gjithë studentët që ende nuk janë vaksinuar, të shfrytëzuar këtë javë të vaksinimit për të mbrojtur veten por edhe si një detyrim moral e përgjegjësi qytetare për mbrojtjen e shëndetit të gjithësecilit. Manastirliu u bën apel studentëve të paraqiten pranë universiteteve për të marrë dozën e vaksinës. Ekipet e vaksinatorëve do të jenë në të gjitha universitetet e vendit për të pritur studentët që të vaksinohen në mënyrë që viti i ri akademik të fillojë me sa më shumë studentë që kanë kryer vaksinën anticovid. Kujtojmë, se fillimi i vitit të ri akademik u shty për të filluar më datë 18 tetorë, duke u lënë kështu hapsirë studentëve të imunizohen dhe të paraqiten të vaksinuar në universitete. Vaksinimi i studentëve pranë fakulteteve do të vijojë gjatë gjithë javës në të gjitha qytetet universitare në vend sipas një kalendari tashmë të përcaktuar. Kujtojmë se deri më tani në vendin tonë janë kryer në total 1,789,592 doza të vaksinës ndaj COVID19. Prej tyre 828,940 qytetarë i kanë kryer të dy dozat e vaksinës antiCOVID.