Edmir Demiraj është vënë në prangat e policisë së Vaut të Dejës, pasi dyshohet se ka qëlluar me armë zjarri në drejtim të një shtetasi tjetër, gjatë konfliktit ndërmjet tyre, për një borxh të pashlyer. Ngjarja ndodhi të mërkurën e 24 korrikut, në fshatin Melgushë, ku gjatë një konflikti për motive të dobëta, ndërmjet shtetasit me iniciale J. M dhe disa shtetasve të tjerë, dyshohet se është qëlluar me armë zjarri. Pas marrjes së infomacionit për konfliktin, shërbimet e Komisariatit të Policisë Vau i Dejës, në bashkëpunim me specialistët për Hetimin e Krimeve ndaj Personit, të Drejtorisë Vendore të Policisë Shkodër kanë identifikuar, kapur dhe ndaluar autorin e dyshuar. Prokuroria e Shkodrës po zhvillon hetime të tjera për të zbardhur të gjithë dinamikën e ngjarjes dhe vënien përpara përgjegjësisë ligjore të personave të përfshirë.