Një ngjarje e rëndë u shënua këtë të shtunë në plazhin e Ksamilin, pasi dy biznesmenë u përfshinë në një konflikt të dhunshëm, duke shqetësuar pushuesit dhe turistët. Sipas informacioneve, i lënduar mbeti Albert Pashaj, pronar i një hoteli, i cili është sulmuar me sende të forta brenda ambienteve të hotelit të tij nga Agim Taraj, pronar i një restortanti. Sherri mes tyre nisi si pasojë e vendosjes së çadrave në hapësirën përballë hotelit, pjesë e vijës bregdetare që shpeshherë është bërë burim mosmarrëveshjesh mes subjekteve private në zonat turistike të jugut. Shkaku kryesor i përplasjes lidhet me pretendimet mbi pronësinë dhe kontrollin e territorit në plazh, një problem që ka marrë përmasa shqetësuese sidomos gjatë sezonit turistik veror, ku fluksi i lartë i pushuesve sjell edhe tension mes operatorëve lokalë. Policia shkoi në vendin e ngjarjes dhe ka nisur hetimet për të zbardhur rrethanat e plota të incidentit, ndërkohë që i plagosuri është dërguar për ndihmë mjekësore dhe ndodhet jashtë rrezikut për jetën. Agim Taraj është shoqëruar në komisariat dhe pritet të merret në pyetje nga policia për të kuptuar se si nisi konflikti që degradoi në përdorimin e sendeve të forta.