Operacioni ‘Bregdeti ynë’ i nisur në fillim të javës në Ksamil dhe Velipojë me qëllim shembjen e ndërtimeve pa leje, po vijon ende për t’u zhvendosur më pas në zonë të vendit. Inspektorati Kombëtar i Mbrojtjes së Territorit ka bërë të ditur se në Velipojë janë prishur 10 objekte të paligjshme nga 15 të konstatuara, ndërkohë që po punohet intensivisht me mjetet e IKMT dhe ushtrisë për pastrimin e inerteve të krijuara. Po ashtu në Ksamil janë prishur 18 objekte pa leje si dhe po bëhet largimi i inerteve, nga 30 objekte që ishin konstatuar si të paligjshme nga strukturat përkatëse. Një pjesë e pronarëve të objekteve pa leje kanë preferuar t’i shembin vetë ato duke hequr edhe materialet apo pajisjet që kanë pasur brenda. Nisja e aksionit ‘Bregdeti ynë’, kundër ndërtimeve pa leje në zonat turistike, u parlajmërua në fillim të qershorit nga kryeministri i vendit Edi Rama gjatë një inspektimi në zonën e Shengjinit. Rama tha se ndërtimet pa leje në bregdet jo vetëm që do të shemben, por edhe do të ketë pasoja për abuzuesit. Me argumentin se shitësit përgjatë rrugëve nacionale përbëjnë burim aksidentesh, qeveria vendosi që edhe ata të mos lejohet më të zhvillojnë aktivitetin e tyre, sidomos gjatë sezonit të verës kur incidentet në rrugë shtohen gjithnjë e më shumë. Kjo nuk është hera e parë që në vendin tonë nis aksioni në zonat bregdetare kundër ndërtimeve pa leje në kohën kur ka nisur edhe sezoni turistik. Kështu ka ndodhur edhe në raste të ngjashme në vitet e kaluara, kur ndërtimet e shembura kanë mbetur si gërmadha për muaj me radhë në zonat ku është ndërhyrë.