Shtetet e Bashkuara të Amerikës do t’i japin Ukrainës mina kundër këmbësorisë. Një lëvizje kjo që pason atë të raketave balistike amerikane me rreze të gjatë veprimi. Vendimi u mor për ta ndihmuar atë që të ngadalësojë përparimin e forcave ushtarake ruse, ndërsa u konfirmua dhe nga sekretari i mbrojtjes Lloyd Austin. Ai tha se fokusi i SHBA është të ndihmojë Ukrainën që të përmbushë nevojat e saj. "Ata i kanë kërkuar këto, dhe kështu mendoj se është një ide e mirë t'i sigurojmë ato," u tha ai gazetarëve gjatë një udhëtimi në Laos. Forcat ukrainase goditën gjatë orëve të para të mëngjesit të së martës depot e municioneve në rajonin Bryansk të Rusisë me raketat me rreze të gjatë veprimi, që zyrtarët ukrainas kërkonin prej kohësh për të goditur zonat nga ku Moska kryente bombardimet kundër qyteteve ukrainase. Të dyja palët paraqitën të dhëna të ndryshme mbi rezultatet e sulmit.